女生提案 Girlnews HK

由22年嘅夏季，草編包就已經開始流行，唔少大牌子23年夏季都推出左新款草編包。

草編包無皮袋咁笨重，自帶一種休閒渡假消暑涼感嘅感覺，耐用性高，而且啡色調嘅袋，百搭易襯，唔會搶左造型嘅焦點，搭配夏季穿搭就啱曬。

Loewe Raffia tote bag

LOEWE 嘅Raffia tote bag款係2023 春夏系列首次推出，特別以酒椰葉纖維同細緻光澤嘅牛皮打造三款袋，除左有經典嘅米色、黑色之外，Raffia 雙色編織款充滿夏季氛圍。簡約袋型輪廓搭皮革handle，每款袋都配有可拆、可調式嘅肩背帶，絕對係今年春夏嘅清新首選。

Prada拉菲草手提袋

Prada嘅拉菲草手提袋近期話題性頗高，佢用料來自於天然物料拉菲草，再採用藤織技術製成柔軟鬆身嘅手提袋，並有一系列充滿夏日風情嘅配色，既實用又時尚。

Dior Lady Dior Oblique 提花藤織袋

提到Dior相信大家第一時間都會諗到經典手袋款式Lady Dior，多年黎推出過唔同版本，今個夏季就將Lady Dior變成藤織袋版本，以Dior嘅工藝加天然色傳統手織柳條製作而成，袋入面 加入Oblique 提花束繩小袋，特別之餘帶點優雅。

Hermès Sabot Butler小牛皮藤織手袋

講到最特別嘅就當然係Hermès馬蹄造型嘅Sabot系列設計，係品牌最新推出嘅設計，馬蹄輪廓致敬品牌建構感美學，同時展現左品牌嘅工藝。呢個袋結合左小牛皮與同柳條編織嘅款式，輕巧兼透視，集優雅與休閒於一身。